Þessi fyrirlestraröð um hernað og heimssöguna er með þeim betri sem ég hef hlýtt á. Kennarinn Jonathan P. Roth leiðir mann í gegnum söguna frá fyrstu ummerkjum um fyrstu mennina og fjallar um baráttu samfélaga sín á milli. Hvers vegna þau hafi þróast með þeim hætti sem þau gerðu og hvaða áhrif þau höfðu á menningu, vísindi og samskipti helstu samfélaga.
Mér finnst Roth gera þetta vel. Hann er ekkert að velta sér upp úr einstaka bardögum eða herforingum heldur bendir hann á samspil hernaðar og heimssögunnar og hvernig nýjungar bárust fram og til baka á milli helstu heimsveldanna s.s. hestvagnar, bogar, ístöð, byssupúður, hernaðartækni o.s.frv.
Ég uppgötvaði margt nýtt við hlustun þessara fyrirlestra sem sýnir manni hve nauðsynlegt er að fylgjast alltaf með því nýjasta sem er að birtast frá fræðimönnum þegar eldri "sannindum" er rutt úr vegi. ( )