Mae Gwasg y Lolfa wedi taro ar fformat hynod hwylus a hwyliog gyda chyfres ‘Ti’n Jocan’. Mae’n gyfle i gymeriadau a chomedïwyr Cymru gael dethol y straeon a’r jôcs sy’n gwneud iddyn nhw chwerthin, a’u rhannu gyda’r darllenydd. I’r sawl sy’n gyfarwydd â’r awdur barfog o’r Bont, does dim angen eich rhybuddio nad llyfr i’r plant nac i’r gweinidog yw Hiwmor Lyn Ebenezer. Mae hyd yn oed rhai o’r jôcs yn yr adran a elwir yn ‘Chwarae Plant’ yn ddigon i wneud i domato gochi! Mae Lyn ei hun yn cydnabod yn y cyflwyniad mai peth cwbl bersonol yw hiwmor – ac mewn casgliad fel hwn fyddech chi ddim yn disgwyl i bob stori apelio at bob un person, nac yn disgwyl i bob jôc daro deuddeg bob tro. Mae nifer o’r themâu yn rhai cyfarwydd mewn cyfrolau o jôcs, fel y 'Doctor Doctor' (thema sy’n teilyngu cyfrol Gymraeg iddi ei hunan). Rhy fyr o’r hanner oedd y bennod hon, ond mae'r hyn a gawn ni yn werth ei gael:

‘Doctor, doctor, rwy wedi torri ’mraich mewn nifer o fanne.’
‘Wel, peidiwch â mynd i’r manne ’ny ’to te.’

Ac wrth gwrs, mae’n rhaid cael adran ar y Cymro, y Sais, y Gwyddel a’r Albanwr – dim gwobr am ddyfalu pwy yw’r cocyn hitio, gan gofio mai Lyn Ebenezer yw’r awdur! Mae’r Saeson, ynghyd â gweinidogion a swyddogion y gyfraith, yn derbyn sawl ergyd rhwng y ddau glawr. Mae yma adran a elwir yn ‘Jôcs Gwyddelig (Cadarnhaol)’ a braf yw medru mwynhau hiwmor cyfoethog y Gwyddel heb orfod chwerthin ar ei ben. Mae hoffter Lyn o’r Ynys Werdd yn ei amlygu ei hun eto gyda’r adran o Jôcs Gwyddelig Gwir – rhai ohonynt yn deillio o brofiadau Lyn tra oedd yn ffilmio gyda Hel Straeon. Dyma, i mi, lle mae cryfder y llyfr, yn y straeon celwydd gole a’r hanesion gwir am gymeriadau a sefyllfaoedd difyr a ffraeth mewn cymunedau yn Iwerddon ac yma yng Nghymru. Does dim syndod, felly, i mi gael mwy o flas ar ail hanner Hiwmor Lyn Ebenezer, ond rhaid i ni gofio eto mai ‘. . . peth cwbl bersonol yw hiwmor’, ac yn ddiamheuol, fe fydd rhywun arall yn mwynhau elfennau gwahanol eto. Mi alla i ddychmygu Lyn yn eistedd ynghanol cwmni mewn tafarn gyda pheint o’i flaen yn adrodd cynnwys y llyfr o’i gof – sit-down comedian penigamp. Un gair o rybudd i chi rhag ofn i chi benderfynu eistedd lawr i fwynhau’r gyfrol gyda gwydred o jin wrth eich ymyl, gofalwch nad oes gan y lemwn goesau!